५. भिंसापनसिक्खापदवण्णना

पञ्चमे भिंसापेय्याति भिंसापनत्थं रूपादीनि उपसंहरेय्य, भयानककथं वा कथेय्य. सो पन भायतु वा, मा वा, इतरस्स पाचित्तियं.

सावत्थियं छब्बग्गिये भिक्खू आरब्भ भिंसापनवत्थुस्मिं पञ्ञत्तं, साधारणपञ्ञत्ति, अनाणत्तिकं, तिकपाचित्तियं. अनुपसम्पन्ने तिकदुक्कटं, न भिंसापेतुकामस्स तथा करोतो, उम्मत्तकादीनञ्च अनापत्ति. उपसम्पन्नता, तस्स दस्सनसवनविसये भिंसापेतुकामताय वायामनन्ति इमानेत्थ द्वे अङ्गानि. समुट्ठानादीनि अनन्तरसिक्खापदसदिसानेवाति.

भिंसापनसिक्खापदवण्णना निट्ठिता.