९. सासङ्कसिक्खापदवण्णना

नवमे उपवस्सं खो पनाति एत्थ उपवस्सन्ति उपवस्स, उपवसित्वाति वुत्तं होति, उपसम्पज्जन्तिआदीसु (विभ. ५७०) विय हेत्थ अनुनासिको दट्ठब्बो, वस्सं उपगन्त्वा वसित्वा चाति अत्थो. इमस्स च पदस्स ‘‘तथारूपेसु भिक्खु सेनासनेसु विहरन्तो’’तिइमिना सम्बन्धो, इदं वुत्तं होति – वस्सं उपगन्त्वा वसित्वा च ततो परं पच्छिमकत्तिकपुण्णमपरियोसानकालं यानि खो पन तानि आरञ्ञकानि…पे… अन्तरघरे निक्खिपेय्याति. तत्थ आरञ्ञकानीति सब्बपच्छिमानि आरोपितेन आचरियधनुना गामस्स इन्दखीलतो पट्ठाय पञ्चधनुसतप्पमाणे पदेसे कतसेनासनानि. सचे पन अपरिक्खित्तो गामो होति, परिक्खेपारहट्ठानतो पट्ठाय मिनेतब्बं. सचे विहारस्स परिक्खेपो वा अपरिक्खित्तस्स यं गामतो सब्बपठमं सेनासनं वा चेतियं वा बोधि वा धुवसन्निपातट्ठानं वा याव, तं ताव पकतिमग्गेन मिनेतब्बं, अञ्ञं मग्गं कातुं, अमग्गेन वा मिनेतुं न वट्टति. सासङ्कसम्मतानीति चोरादीनं निविट्ठोकासादिदस्सनेन ‘‘सासङ्कानी’’ति सम्मतानि, एवं सञ्ञातानीति अत्थो. सह पटिभयेन सप्पटिभयानि, चोरेहि मनुस्सानं हतविलुत्ताकोटितभावदस्सनतो सन्निहितबलवभयानीति अत्थो.

अन्तरघरे निक्खिपेय्याति आरञ्ञकस्स सेनासनस्स समन्ता सब्बदिसाभागेसु अत्तना अभिरुचिते गोचरगामे निक्खिपेय्य. तञ्च खो सतिया अङ्गसम्पत्तिया, तत्रायं अङ्गसम्पत्ति – पुरिमिकाय उपगन्त्वा महापवारणाय पवारितो होति, इदमेकं अङ्गं. कत्तिकमासोयेव होति, इदं दुतियं अङ्गं. पञ्चधनुसतिकपच्छिमप्पमाणयुत्तं सेनासनं होति, इदं ततियं अङ्गं. ऊनप्पमाणे वा गावुततो अतिरेकप्पमाणे वा न लभति, यत्र हि पिण्डाय चरित्वा भुत्तवेलायमेव पुन विहारं सक्का आगन्तुं, तदेव इधाधिप्पेतं. सासङ्कसप्पटिभयमेव होति, इदं चतुत्थं अङ्गं होतीति. कोचिदेव पच्चयोति किञ्चिदेव कारणं. तेन चीवरेनाति तेन अन्तरघरे निक्खित्तचीवरेन. विप्पवासायाति वियोगवासाय. ततो चे उत्तरि विप्पवसेय्याति छारत्ततो उत्तरि तस्मिं सेनासने सत्तमं अरुणं उट्ठापेय्याति अत्थो, तथा असक्कोन्तेन पन गामसीमं ओक्कमित्वा सभायं वा यत्थ कत्थचि वा वसित्वा चीवरप्पवत्तिं ञत्वा पक्कमितुं वट्टति. अञ्ञत्र भिक्खुसम्मुतियाति यं सङ्घो गिलानस्स भिक्खुनो चीवरेन विप्पवाससम्मुतिं देति, तं ठपेत्वा अलद्धसम्मुतिकस्स अतिरेकछारत्तं विप्पवसतो निस्सग्गियं होति.

सावत्थियं सम्बहुले भिक्खू आरब्भ चीवरविप्पवासवत्थुस्मिं पञ्ञत्तं, सेसमेत्थ चीवरवग्गस्स दुतियसिक्खापदे वुत्तनयेनेव वेदितब्बन्ति.

सासङ्कसिक्खापदवण्णना निट्ठिता.