७. विहारकारसिक्खापदवण्णना

सत्तमे महल्लकन्ति ससामिकभावेन सञ्ञाचितकुटितो महन्तभावो एतस्स अत्थीति महल्लको, यस्मा वा वत्थुं देसापेत्वा पमाणातिक्कमेनापि कातुं वट्टति, तस्मा पमाणमहन्ततायपि महल्लको, तं महल्लकं. यस्मा पनस्स तं पमाणमहन्तत्तं ससामिकत्ताव लब्भति, तस्मा तदत्थदस्सनत्थं ‘‘महल्लको नाम विहारो ससामिको वुच्चती’’ति एवमस्स पदभाजने (पारा. ३६७) वुत्तं. सेसं सब्बं कुटिकारसिक्खापदे वुत्तसदिसं, ससामिकभावमत्तमेव हि विसेसो.

कोसम्बियं छन्नत्थेरं आरब्भ चेतियरुक्खं छेदापनवत्थुस्मिं पञ्ञत्तभावो, अकिरियमत्ततो समुट्ठानभावो, एकसङ्घादिसेसता च एत्थ विसेसो.

विहारकारसिक्खापदवण्णना निट्ठिता.