१. गब्भिनीसिक्खापदवण्णना

गब्भिनिवग्गस्स पठमे ‘‘गब्भिनी’’ति जानित्वा उपज्झायाय वुट्ठापेन्तिया गणपरियेसनादीसु च ञत्तिकम्मवाचाद्वये च दुक्कटं, कम्मवाचापरियोसाने पाचित्तियं.

सावत्थियं सम्बहुला भिक्खुनियो आरब्भ गब्भिनिं वुट्ठापनवत्थुस्मिं पञ्ञत्तं, गब्भिनिया वेमतिकाय अगब्भिनिया गब्भिनिसञ्ञाय चेव वेमतिकाय च दुक्कटं. उभोसु अगब्भिनिसञ्ञाय, उम्मत्तिकादीनञ्च अनापत्ति. गब्भिनिता, ‘गब्भिनी’ति जाननं, वुट्ठापनन्ति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन पण्णत्तिवज्जं, तिचित्तं, तिवेदनन्ति.

गब्भिनीसिक्खापदवण्णना निट्ठिता.