६. भोजनदानसिक्खापदवण्णना

छट्ठे सहत्थाति कायेन वा कायप्पटिबद्धेन वा निस्सग्गियेन वा ठपेत्वा पञ्चसहधम्मिके अवसेसानं अञ्ञत्र उदकदन्तपोना यंकिञ्चि अज्झोहरणीयं ददन्तिया पाचित्तियं.

सावत्थियं थुल्लनन्दं आरब्भ अगारिकस्स खादनीयभोजनीयदानवत्थुस्मिं पञ्ञत्तं, उदकदन्तपोने दुक्कटं. या पन दापेति न देति, उपनिक्खिपित्वा देति, बाहिरलेपं देति, तस्सा, उम्मत्तिकादीनञ्च अनापत्ति. अञ्ञत्र उदकदन्तपोना अज्झोहरणियं, ठपेत्वा पञ्च सहधम्मिके अञ्ञस्स सहत्था दानन्ति इमानेत्थ द्वे अङ्गानि. समुट्ठानादीनि एळकलोमसदिसानीति.

भोजनदानसिक्खापदवण्णना निट्ठिता.