३. सुत्तकन्तनसिक्खापदवण्णना

ततिये सुत्तन्ति छन्नं अञ्ञतरं. कन्तेय्याति एत्थ यत्तकं हत्थेन अञ्छितं होति, तस्मिं तक्कम्हि वेठिते एका आपत्ति. इदञ्हि सन्धाय पदभाजनीये (पाचि. ९८८) ‘‘उज्जवुज्जवे’’ति वुत्तं.

सावत्थियं छब्बग्गिया भिक्खुनियो आरब्भ सुत्तं कन्तनवत्थुस्मिं पञ्ञत्तं, कन्तनतो पुब्बे कप्पासविचिननं आदिं कत्वा सब्बप्पयोगेसु हत्थवारगणनाय दुक्कटं. कन्तितसुत्तं कन्तन्तिया, उम्मत्तिकादीनञ्च अनापत्ति. अकन्तितता, कन्तनन्ति इमानेत्थ द्वे अङ्गानि. समुट्ठानादीनि एळकलोमसदिसानीति.

सुत्तकन्तनसिक्खापदवण्णना निट्ठिता.