५. निक्कड्ढनसिक्खापदवण्णना

पञ्चमे उपस्सयं दत्वाति सकवाटबद्धं अत्तनो पुग्गलिकविहारं दत्वा. निक्कड्ढेय्याति बहूनिपि द्वारानि एकप्पयोगेन निक्कड्ढेन्तिया एका आपत्ति, नानापयोगेहि पयोगगणनाय आपत्तियो, आणत्तियम्पि एसेव नयो. सचे पन ‘‘इमञ्चिमञ्च द्वारं अतिक्कामेही’’ति आणापेति, एकाय आणत्तिया एव द्वारगणनाय आपत्तियो.

सावत्थियं थुल्लनन्दं आरब्भ एतादिसे वत्थुस्मिं पञ्ञत्तं, तिकपाचित्तियं, अकवाटबद्धतो दुक्कटं, अनुपसम्पन्नाय तिकदुक्कटं, सकवाटबद्धतो वा अकवाटबद्धतो वा उभिन्नम्पि परिक्खारनिक्कड्ढने दुक्कटमेव, सेसं सङ्घिकविहारनिक्कड्ढनसिक्खापदे वुत्तनयमेवाति.

निक्कड्ढनसिक्खापदवण्णना निट्ठिता.