३. अफासुकरणसिक्खापदवण्णना

ततिये अफासुन्ति ‘‘इमिना इमिस्सा अफासु भविस्सती’’ति अनापुच्छा पुरतो चङ्कमनट्ठाननिस्सज्जादयो वा उद्दिसउद्दिसापनपरिपुच्छनसज्झायं वा करोन्तिया चङ्कमने निवत्तनगणनाय, ठानादीसु पयोगगणनाय, उद्देसादीसु पदगणनाय पाचित्तियं.

सावत्थियं थुल्लनन्दं आरब्भ सञ्चिच्च अफासुकरणवत्थुस्मिं पञ्ञत्तं, तिकपाचित्तियं, अनुपसम्पन्नाय तिकदुक्कटं, न अफासुकामताय, आपुच्छा पुरतो चङ्कमनादीनि करोन्तिया, उम्मत्तिकादीनञ्च अनापत्ति. उपसम्पन्नता, अफासुकामता, अफासुकरणं, अनापुच्छनन्ति इमानेत्थ चत्तारि अङ्गानि. समुट्ठानादीनि अदिन्नादानसदिसानि, इदं पन किरियाकिरियं, दुक्खवेदनन्ति.

अफासुकरणसिक्खापदवण्णना निट्ठिता.