१. एकमञ्चतुवट्टनसिक्खापदवण्णना

तुवट्टवग्गस्स पठमे तुवट्टेय्युन्ति निपज्जेय्युं. तासु पन एकाय वा निपन्नाय अपरा निपज्जतु, द्वेपि वा सहेव निपज्जन्तु, द्विन्नम्पि पाचित्तियं.

सावत्थियं सम्बहुला भिक्खुनियो आरब्भ द्विन्नं एकमञ्चे तुवट्टनवत्थुस्मिं पञ्ञत्तं, सचे पन एकाय निपन्नाय एका निसीदति, उभो वा निसीदन्ति, तासं, उम्मत्तिकादीनञ्च अनापत्ति. एकमञ्चता, द्विन्नं तुवट्टनन्ति इमानेत्थ द्वे अङ्गानि. समुट्ठानादीनि एळकलोमसदिसानीति.

एकमञ्चतुवट्टनसिक्खापदवण्णना निट्ठिता.