१०. कथिनुद्धारसिक्खापदवण्णना

दसमे धम्मिकं कथिनुद्धारन्ति सब्बासं भिक्खुनीनं अकालचीवरं दातुकामेन उपासकेन यत्तको अत्थारमूलिको आनिसंसो, ततो अधिकं वा समकं वा दत्वा याचितेन समग्गेन भिक्खुनिसङ्घेन यं कथिनं ञत्तिदुतियकम्मेन अन्तरा उद्धरीयति, तस्स सो उद्धारो ‘धम्मिको’ति वुच्चति, एवरूपं कथिनुद्धारन्ति अत्थो. पटिबाहेय्याति निवारेय्य, तस्स एवरूपं कथिनुद्धारं निवारेन्तिया पाचित्तियं.

सावत्थियं थुल्लनन्दं आरब्भ कथिनुद्धारं पटिबाहनवत्थुस्मिं पञ्ञत्तं, सेसं सत्तमे वुत्तनयेनेव वेदितब्बन्ति.

कथिनुद्धारसिक्खापदवण्णना निट्ठिता.

नग्गवग्गो ततियो.