१. नग्गसिक्खापदवण्णना

नग्गवग्गस्स पठमे नग्गाति अनिवत्था वा अपारुता वा. एवञ्हि नहायन्तिया सब्बप्पयोगेसु दुक्कटं, नहानपरियोसाने पाचित्तियं.

सावत्थियं सम्बहुला भिक्खुनियो आरब्भ एवं नहानवत्थुस्मिं पञ्ञत्तं, उदकसाटिकचीवरे अच्छिन्ने वा नट्ठे वा, ‘‘महग्घं इदं दिस्वा चोरापि हरेय्यु’’न्ति एवरूपासु आपदासु वा नहायन्तिया, उम्मत्तिकादीनञ्च अनापत्ति. नग्गता, अनुञ्ञातकारणाभावो, नहानपरियोसानन्ति इमानेत्थ तीणि अङ्गानि. समुट्ठानादीनि एळकलोमसदिसानीति.

नग्गसिक्खापदवण्णना निट्ठिता.