३. चीवरपरिवत्तनसिक्खापदवण्णना

ततिये हन्दाति गण्ह. अच्छिन्देय्याति सयं अच्छिन्दन्तिया बन्धित्वा ठपितेसु बहूसुपि एकापत्ति, इतरेसु वत्थुगणनाय आपत्तियो. अच्छिन्दापने पन एकाय आणत्तिया बहूसु अच्छिन्नेसुपि एकावापत्ति.

सावत्थियं थुल्लनन्दं आरब्भ चीवरं परिवत्तेत्वा अच्छिन्दनवत्थुस्मिं पञ्ञत्तं, साणत्तिकं, तिकपाचित्तियं, अञ्ञस्मिं परिक्खारे तिकदुक्कटं, अनुपसम्पन्नाय चीवरेपि तिकदुक्कटमेव. या पन ताय वा दिय्यमानं, तस्सा वा विस्सासं गण्हाति, तस्सा, उम्मत्तिकादीनञ्च अनापत्ति. उपसम्पन्नता, परिवत्तितचीवरस्स विकप्पनुपगता, सकसञ्ञाय अच्छिन्दनं वा अच्छिन्दापनं वाति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

चीवरपरिवत्तनसिक्खापदवण्णना निट्ठिता.