४. उक्खित्तकओसारणसिक्खापदवण्णना

चतुत्थे उक्खित्तन्ति आपत्तिया अदस्सनादीसु उक्खित्तं. अनञ्ञाय गणस्स छन्दन्ति तस्सेव कारकसङ्घस्स छन्दं अजानित्वा. ओसारेय्याति ओसारणकम्मं करेय्य. तस्सा एवं करोन्तिया, गणपरियेसने सीमासम्मुतिया ञत्तिया च दुक्कटं, द्वीहि कम्मवाचाहि थुल्लच्चयं, कम्मवाचापरियोसाने सङ्घादिसेसो.

सावत्थियं थुल्लनन्दं आरब्भ एवं ओसारणवत्थुस्मिं पञ्ञत्तं, तिकसङ्घादिसेसं, अधम्मकम्मे तिकदुक्कटं, कारकसङ्घं वा आपुच्छित्वा, गणस्स वा छन्दं जानित्वा, वत्ते वा वत्तन्तिं, असन्ते कारकसङ्घे ओसारेन्तिया, उम्मत्तिकादीनञ्च अनापत्ति. धम्मकम्मेन उक्खित्तता, अञ्ञत्र अनुञ्ञातकारणा ओसारणन्ति इमानेत्थ द्वे अङ्गानि. समुट्ठानादीनि सङ्घभेदसिक्खापदे वुत्तनयानेव, इदं पन किरियाकिरियन्ति.

उक्खित्तकओसारणसिक्खापदवण्णना निट्ठिता.