सोधनहारवण्णना

‘‘ममं वा…पे… भासेय्यु’’न्ति आरम्भो. ‘‘धम्मस्स…पे… सङ्घस्स…पे… भासेय्यु’’न्ति पदसुद्धि, नो आरम्भसुद्धि. ‘‘तत्र तुम्हेहि…पे… करणीया’’ति पदसुद्धि चेव आरम्भसुद्धि च. दुतियनयादीसुपि एसेव नयो. तथा ‘‘अप्पमत्तकं खो पनेत’’न्तिआदि आरम्भो. ‘‘कतम’’न्तिआदि पुच्छा. ‘‘पाणातिपातं पहाया’’तिआदि पदसुद्धि, नो आरम्भसुद्धि, नो च पुच्छासुद्धि. ‘‘इदं खो’’तिआदि पुच्छासुद्धि चेव पदसुद्धि च आरम्भसुद्धि च.

तथा ‘‘अत्थि भिक्खवे’’तिआदि आरम्भो. ‘‘कतमे च ते’’तिआदि पुच्छा. ‘‘सन्ति भिक्खवे’’तिआदि आरम्भो. ‘‘कि’’न्तिआदि आरम्भ पुच्छा. ‘‘यथासमाहिते’’तिआदि पदसुद्धि, नो आरम्भसुद्धि नो च पुच्छासुद्धि. ‘‘इमे खो ते’’तिआदि पदसुद्धि चेव पुच्छासुद्धि च आरम्भसुद्धि च. इमिना नयेन सब्बत्थ आरम्भादयो वेदितब्बाति. अयं सोधनो हारो.