३. निरोधसच्चनिद्देसवण्णना

२०४. तण्हाय विरज्जनं हलिद्दिरागस्स विय पलुज्जनन्ति कत्वा आह ‘‘खयगमनवसेना’’ति. विच्छिन्नं निरुज्झनन्ति वुत्तं ‘‘अप्पवत्तिगमनवसेना’’ति. चजनं छड्डनं, हापनं वाति आह ‘‘अनपेक्खताय चजनवसेन, हानिवसेन चा’’ति.

तदप्पवत्ति वियाति तस्सा तित्तअलाबुवल्लिया अप्पवत्ति विय. अप्पवत्तिहेतुभूतम्पि निब्बानं तण्हाय अप्पवत्ति विय गय्हतीति आह ‘‘तदप्पवत्ति विया’’ति यथा ‘‘रागक्खयो’’ति (सं. नि. ४.३१५, ३३०). अप्पवत्तिभूतन्ति तण्हाय अप्पवत्तिया पत्तं, पत्तब्बन्ति अत्थो. निब्बानं आगम्म निरुद्धायपि तण्हाय पियरूपसातरूपेसु निरुद्धाति वत्तब्बतादस्सनत्थं वुत्ताति योजना. एत्थ च यस्मा मग्गो, निब्बानञ्च तण्हाय समुच्छेदसाधनं, तस्मा ‘‘पुरिमा वा उपमा’’तिआदिना उपमाद्वयं उभयत्थ यथाक्कमं योजितं, उभयट्ठानियं पन उभयत्थापि लब्भतेव.

निरोधसच्चनिद्देसवण्णना निट्ठिता.