९. यथाकम्मूपगतञाणकथावण्णना

३७७. दिब्बेन चक्खुना यथाकम्मूपगे सत्ते पजानातीति यथाकम्मूपगतञाणस्स उपनिस्सये दिब्बचक्खुम्हि करणनिद्देसो कतो, न यथाकम्मूपगतजाननकिच्चके. तंकिच्चकेयेव पन परो करणनिद्देसं मञ्ञतीति आह ‘‘अयोनिसो गहेत्वा’’ति. यथाकम्मूपगतञाणमेव दिब्बचक्खुन्ति लद्धीति इमिना वचनेन दिब्बचक्खुमेव यथाकम्मूपगतञाणन्ति एवं भवितब्बं. एव-सद्दो च अट्ठाने ठितो दिब्बचक्खुसद्दस्स परतो योजेतब्बो. यथाकम्मूपगतञाणस्स हि सो दिब्बचक्खुतो अत्थन्तरभावं निवारेति. न हि दिब्बचक्खुस्स यथाकम्मूपगतञाणतोति.

यथाकम्मूपगतञाणकथावण्णना निट्ठिता.