४. विमुच्चमानकथावण्णना

३६६. झानेन विक्खम्भनविमुत्तिया विमुत्तं चित्तं मग्गक्खणे समुच्छेदविमुत्तिया विमुच्चमानं नाम होतीति एतिस्सा लद्धिया को दोसोति विचारेतब्बं. यदि विप्पकतनिद्देसे दोसो, तत्रापि तेन विमुच्चमानताय ‘‘विमुत्तं विमुच्चमान’’न्ति वुत्तं. सति च दोसे उप्पादक्खणे विमुत्तं, वयक्खणे विमुच्चमानन्ति विमुत्तविमुच्चमानवचनस्स न चोदेतब्बं सिया, अथ खो विमुच्चमानवचनमेवाति. एकदेसेन, एकदेसे वा विमुच्चमानस्स च विमुत्तकिरियाय एकदेसो विसेसनं होतीति ‘‘भावनपुंसक’’न्ति वुत्तं. कटादयोति कटपटादयो. एकेनेव चित्तेनाति एकेनेव फलचित्तेनाति अधिप्पायो.

विमुच्चमानकथावण्णना निट्ठिता.