५. वचीभेदकथावण्णना

३२६. वचीभेदकथायं लोकुत्तरं पठमज्झानं समापन्नोति पठममग्गं सन्धाय वदति, यस्मा सो दुक्खन्ति विपस्सति, तस्मा दुक्खमिच्चेव वाचं भासति, न समुदयोतिआदीनीति अधिप्पायो.

३२८. येन तं सद्दं सुणातीति इदं वचीसमुट्ठापनक्खणे एव एतं सद्दं सुणातीति इच्छिते आरोपिते वा युज्जति.

३३२. लोकुत्तरमग्गक्खणे वचीभेदं इच्छतो परस्स अभिभूसुत्ताहरणे अधिप्पायो वत्तब्बो.

वचीभेदकथावण्णना निट्ठिता.