१. सुद्धब्रह्मचरियकथावण्णना

२६९. ‘‘परनिम्मितवसवत्तिदेवे उपादाय तदुपरी’’ति वुत्तं, ‘‘तीहि, भिक्खवे, ठानेही’’ति (अ. नि. ९.२१) पन सुत्तस्स वचनेन हेट्ठापि मग्गभावनम्पि न इच्छन्तीति विञ्ञायति.

२७०. ‘‘गिहीनञ्चेव एकच्चानञ्च देवानं मग्गपटिलाभं सन्धाय पटिक्खेपो तस्सेवा’’ति वुत्तं, ‘‘यत्थ नत्थी’’ति पन ओकासवसेन पुट्ठो पुग्गलवसेन तस्स पटिक्खेपो न युत्तो. यदि च तस्सायं अधिप्पायो, सकवादिना समानाधिप्पायत्ता न निग्गहेतब्बो.

२७१. एकन्तरिकपञ्हाति परवादीसकवादीनं अञ्ञमञ्ञं पञ्हन्तरिका पञ्हा.

सुद्धब्रह्मचरियकथावण्णना निट्ठिता.