२. अञ्ञमञ्ञपच्चयकथावण्णना

७१८-७१९. अपुञ्ञाभिसङ्खारोव गहितो ‘‘ननु अविज्जा सङ्खारेन सहजाता’’ति वुत्तत्ताति अधिप्पायो. सहजातअञ्ञमञ्ञअत्थिअविगतसम्पयुत्तवसेनाति एत्थ निस्सयो कमभेदेन अत्थिग्गहणेन गहितो होतीति न वुत्तो, कम्माहारा असाधारणतायाति वेदितब्बा. वक्खति हि ‘‘तीणि उपादानानि अविज्जाय सङ्खारा विय तण्हाय पच्चया होन्ती’’ति (कथा. अट्ठ. ७१८-७१९), तस्मा उपादानेहि समाना एवेत्थ सङ्खारानं पच्चयता दस्सिताति.

अञ्ञमञ्ञपच्चयकथावण्णना निट्ठिता.