८. अट्ठमनयो विप्पयुत्तेनसम्पयुत्तपदवण्णना

३१७. विप्पयुत्तेनसम्पयुत्तपदनिद्देसे रूपक्खन्धादीहि विप्पयुत्तेनसम्पयुत्तमेव यथानिद्धारितं नत्थीति ‘‘रूपक्खन्धेन ये धम्मा विप्पयुत्ता, तेहि धम्मेहि ये धम्मा सम्पयुत्ता’’ति अवत्वा ‘‘रूपक्खन्धेन ये धम्मा विप्पयुत्ता, ते धम्मा कतिहि खन्धेहि…पे… सम्पयुत्ताति नत्थी’’ति वुत्तं. तेन रूपक्खन्धेन विप्पयुत्तानं केनचि खन्धादिना सम्पयोगाभावतो यथानिद्धारितं विप्पयुत्तेनसम्पयुत्तमेव नत्थि, कुतो तस्स पुन खन्धादीहि सम्पयुत्तताति दस्सेति.

अट्ठमनयविप्पयुत्तेनसम्पयुत्तपदवण्णना निट्ठिता.