७-११. सञ्ञासुत्तादिवण्णना

२७-३१. सत्तमे अनिच्चाति अनुपस्सति एतायाति अनिच्चानुपस्सना. तथापवत्तविपस्सना पन यस्मा अत्तना सहगतसञ्ञाय भाविताय भाविता एव होति, तस्मा वुत्तं ‘‘अनिच्चानुपस्सनादीहि सहगतसञ्ञा’’ति. इमा सत्त लोकियविपस्सनापि होन्ति ‘‘अनिच्च’’न्तिआदिना पवत्तनतो. ‘‘एतं सन्तं एतं पणीतं यदिदं सब्बसङ्खारसमथो’’ति आगतवसेन पनेत्थ द्वे लोकुत्तरा होन्तीति वेदितब्बा. ‘‘विरागो निरोधो’’ति हि तत्थ निब्बानं वुत्तन्ति इध विरागसञ्ञा, ता वुत्तसञ्ञा निब्बानारम्मणापि सियुं. सेसमेत्थ सुविञ्ञेय्यमेव. अट्ठमादीनि उत्तानत्थानेव.

सञ्ञासुत्तादिवण्णना निट्ठिता.

वज्जिसत्तकवग्गवण्णना निट्ठिता.