५. अधिगमसुत्तवण्णना

७९. पञ्चमे आगच्छन्ति एतेन कुसला वा अकुसला वाति आगमनं, कुसलाकुसलानं उप्पत्तिकारणं. तत्थ कुसलोति आगमनकुसलो. एवं धम्मे मनसिकरोतो कुसला वा अकुसला वा धम्मा अभिवड्ढन्तीति एवं जानन्तो. अपगच्छन्ति कुसला वा अकुसला वा एतेनाति अपगमनं. तेसं एव अनुप्पत्तिकारणं, तत्थ कुसलोति अपगमनकुसलो. एवं धम्मे मनसिकरोतो कुसला वा अकुसला वा धम्मा नाभिवड्ढन्तीति एवं जानन्तो. उपायकुसलोति ठानुप्पत्तिकपञ्ञासमन्नागतो. इदञ्च अच्चायिककिच्चे वा भये वा उप्पन्ने तस्स तिकिच्छनत्थं ठानुप्पत्तिया कारणजाननवसेन वेदितब्बं.

अधिगमसुत्तवण्णना निट्ठिता.