७. खेमसुत्तवण्णना

४९. सत्तमे वुत्थब्रह्मचरियवासोति निवुत्थब्रह्मचरियवासो. कतकरणीयोति एत्थ करणीयन्ति परिञ्ञापहानभावनासच्छिकिरियमाह. तं पन यस्मा चतूहि मग्गेहि पच्चेकं चतूसु सच्चेसु कत्तब्बत्ता सोळसविधं वेदितब्बं. तेनाह ‘‘चतूहि मग्गेहि कत्तब्ब’’न्ति. खन्धकिलेसअभिसङ्खारसङ्खाता तयो ओसीदापनट्ठेन भारा वियाति भारा. ते ओहिता ओरोपिता निक्खित्ता पातिता एतेनाति ओहितभारो. तेनाह ‘‘खन्धभारं…पे… ओतारेत्वा ठितो’’ति. अनुप्पत्तो सदत्थन्ति अनुप्पत्तसदत्थो. सदत्थोति च सकत्थमाह क-कारस्स द-कारं कत्वा. एत्थ हि अरहत्तं अत्तनो योनिसोमनसिकारायत्तत्ता अत्तूपनिबन्धट्ठेन ससन्तानपरियापन्नत्ता अत्तानं अविजहनट्ठेन अत्तनो उत्तमत्थेन च अत्तनो अत्थत्ता ‘‘सकत्थो’’ति वुच्चति. तेनाह ‘‘सदत्थो वुच्चति अरहत्त’’न्ति. सम्मदञ्ञा विमुत्तोति सम्मा अञ्ञाय विमुत्तो, अच्छिन्नभूताय मग्गपञ्ञाय सम्मा यथाभूतं दुक्खादीसु यो यथा जानितब्बो, तथा जानित्वा विमुत्तोति अत्थो. तेनाह ‘‘सम्मा हेतुना’’तिआदि. विमुत्तोति च द्वे विमुत्तियो सब्बस्स चित्तसंकिलेसस्स मग्गो निब्बानाधिमुत्ति च. निब्बाने अधिमुच्चनं तत्थ निन्नपोणपब्भारताय. अरहा सब्बकिलेसेहि विमुत्तचित्तत्ता चित्तविमुत्तिया विमुत्तो. निब्बानं अधिमुत्तत्ता निब्बाने विमुत्तो. सेसमेत्थ उत्तानमेव.

खेमसुत्तवण्णना निट्ठिता.