३. भयसुत्तवण्णना

२३. ततिये सम्भवति जातिमरणं एतेनाति सम्भवो, उपादानन्ति आह ‘‘जातिया च मरणस्स च सम्भवे पच्चयभूते’’ति. अनुपादाति अनुपादाय. तेनाह ‘‘अनुपादियित्वा’’ति. जातिमरणानि सम्मा खीयन्ति एत्थाति जातिमरणसङ्खयो, निब्बानन्ति आह ‘‘जातिमरणानं सङ्खयसङ्खाते निब्बाने’’ति. सब्बदुक्खं उपच्चगुन्ति सकलम्पि वट्टदुक्खं अतिक्कन्ता चरिमचित्तनिरोधेन वट्टदुक्खलेसस्सपि असम्भवतो.

भयसुत्तवण्णना निट्ठिता.