५. पठमयोधाजीवसुत्तवण्णना

७५. पञ्चमे युज्झनं योधो, सो आजीवो एतेसन्ति योधाजीवा. तेनाह ‘‘युद्धूपजीविनो’’ति. सन्थम्भित्वा ठातुं न सक्कोतीति बद्धो धितिसम्पन्नो ठातुं न सक्कोति. समागतेति सम्पत्ते. ब्यापज्जतीति विकारमापज्जति. तेनाह ‘‘पकतिभावं जहती’’ति.

रजग्गस्मिन्ति पच्चत्ते भुम्मवचनन्ति आह ‘‘किं तस्स पुग्गलस्स रजग्गं नामा’’ति. विनिब्बेठेत्वाति गहितग्गहणं विस्सज्जापेत्वा. मोचेत्वाति सरीरतो अपनेत्वा.

पठमयोधाजीवसुत्तवण्णना निट्ठिता.