१-२. अक्कोसकसुत्तादिवण्णना

२११-२. दुतियस्स पठमे दसहि अक्कोसवत्थूहि अक्कोसकोति ‘‘बालोसि, मूळ्होसि, ओट्ठोसि, गोणोसि, गद्रभोसी’’तिआदिना दसहि अक्कोसवत्थूहि अक्कोसको. ‘‘होतु, मुण्डकसमण, अदण्डो अहन्ति करोसि, इदानि ते राजकुलं गन्त्वा दण्डं आरोपेस्सामी’’तिआदीनि वदन्तो परिभासको नामाति आह ‘‘भयदस्सनेन परिभासको’’ति. लोकुत्तरधम्मा अपायमग्गस्स परिपन्थभावतो परिपन्थो नामाति आह ‘‘लोकुत्तरपरिपन्थस्स छिन्नत्ता’’ति, लोकुत्तरसङ्खातस्स अपायमग्गपरिपन्थस्स छिन्नत्ताति अत्थो. दुतिये नत्थि वत्तब्बं.

अक्कोसकसुत्तादिवण्णना निट्ठिता.