७. कामसुत्तवण्णना

७. सत्तमे असन्ति लूनन्ति तेनाति असितं, दात्तं. विविधा आभञ्जन्ति भारं ओलम्बेन्ति तेनाति ब्याभङ्गी, विधं. कुलपुत्तोति एत्थ दुविधो कुलपुत्तो जातिकुलपुत्तो, आचारकुलपुत्तो च. तत्थ ‘‘तेन खो पन समयेन रट्ठपालो नाम कुलपुत्तो तस्मिंयेव थुल्लकोट्ठिके अग्गकुलिकस्स पुत्तो’’ति (म. नि. २.२९४) एवं आगतो उच्चकुलप्पसुतो जातिकुलपुत्तो नाम. ‘‘ये ते कुलपुत्ता सद्धा अगारस्मा अनगारियं पब्बजिता’’ति (म. नि. १.३४) एवं आगता पन यत्थ कत्थचि कुले पसुतापि आचारसम्पन्ना आचारकुलपुत्तो नाम. इध पन आचारकुलपुत्तो अधिप्पेतो. तेनाह ‘‘कुलपुत्तोति आचारकुलपुत्तो’’ति. युत्तन्ति अनुच्छविकं, एवं वत्तब्बतं अरहतीति अत्थो. सेसमेत्थ उत्तानमेव.

कामसुत्तवण्णना निट्ठिता.