१-३. अभिञ्ञासुत्तादिवण्णना

२५४-२५६. छट्ठस्स पठमे पच्चनीकसमनतो समथो, समाधीति आह ‘‘चित्तेकग्गता’’ति. अनिच्चादिना विविधेनाकारेन दस्सनतो विपस्सना, सङ्खारपरिग्गाहकञाणं. तेनाह ‘‘सङ्खारपरिग्गहविपस्सनाञाण’’न्ति.

दुतिये अनरियेहि परियेसितब्बत्ता अनरियानं परियेसनाति अनरियपरियेसना. सयं लामकताय अनरियानं परियेसनाति वा अनरियपरियेसना. जरासभावन्ति जीरणपकतिकं. ततियं उत्तानमेव.

अभिञ्ञासुत्तादिवण्णना निट्ठिता.