३-९. सोणकायनसुत्तादिवण्णना

२३४-२४०. ततिये पुरिमानि, भन्ते, दिवसानि पुरिमतरानीति एत्थ हिय्यो दिवसं पुरिमं नाम, ततो परं पुरिमतरन्ति आह ‘‘अतीतानन्तरदिवसतो पट्ठाया’’तिआदि. इति इमेसु द्वीसु पवत्तितो यथाक्कमं पुरिमपुरिमतरभावो दस्सितो. एवं सन्तेपि यदेत्थ ‘‘पुरिमतर’’न्ति वुत्तं, ततो पभुति यं यं ओरं, तं तं पुरिमं. यं यं परं, तं तं पुरिमतरं ओरपारभावस्स विय पुरिमतरभावस्स च अपेक्खासिद्धत्ता. सेसं वुत्तनयमेव. चतुत्थादीनि उत्तानत्थानेव.

सोणकायनसुत्तादिवण्णना निट्ठिता.