७-८. महामोग्गल्लानसुत्तादिवण्णना

१६७-१६८. सत्तमट्ठमेसु महामोग्गल्लानत्थेरस्सातिआदिना मोग्गल्लानत्थेरस्स हेट्ठा तिण्णं मग्गानं सुखपटिपददन्धाभिञ्ञभावो, अरहत्तमग्गस्स दुक्खपटिपदखिप्पाभिञ्ञभावो वुत्तो, सारिपुत्तत्थेरस्स पन हेट्ठिमानं तिण्णं मग्गानं सुखपटिपददन्धाभिञ्ञभावो, अरहत्तमग्गस्स च सुखपटिपदखिप्पाभिञ्ञभावो दस्सितो. यं पन वुत्तं विसुद्धिमग्गे (विसुद्धि. २.८०१) ‘‘बुद्धानं पन चत्तारोपि मग्गा सुखपटिपदखिप्पाभिञ्ञाव अहेसुं, तथा धम्मसेनापतिस्स. महामोग्गल्लानत्थेरस्स पन पठममग्गो सुखपटिपदखिप्पाभिञ्ञो अहोसि, उपरि तयो दुक्खपटिपददन्धाभिञ्ञा’’ति. यञ्च वुत्तं अट्ठसालिनियं (ध. स. अट्ठ. १४७६) ‘‘तथागतस्स हि सारिपुत्तत्थेरस्स च चत्तारोपि मग्गा सुखपटिपदखिप्पाभिञ्ञाव अहेसुं, महामोग्गल्लानत्थेरस्स पन पठममग्गो सुखपटिपदखिप्पाभिञ्ञो उपरि तयो दुक्खपटिपदखिप्पाभिञ्ञा’’ति, तं सब्बं अञ्ञमञ्ञं नानुलोमेति. इमाय पाळिया इमाय च अट्ठकथाय न समेति, तस्मा वीमंसितब्बमेतं. तंतंभाणकानं वा मतेन तत्थ तत्थ तथा तथा वुत्तन्ति गहेतब्बं.

महामोग्गल्लानसुत्तादिवण्णना निट्ठिता.