८. दुतियतथागतअच्छरियसुत्तवण्णना

१२८. अट्ठमे आलीयन्ति आरमितब्बट्ठेन सेवीयन्तीति आलया, पञ्च कामगुणा. आरमन्तीति रतिं विन्दन्ति कीळन्ति लळन्ति. आलीयन्ति वा अल्लीयन्ता अभिरमणवसेन सेवन्तीति आलया, तण्हाविचरितानि. तेहि आलयेहि रमन्तीति आलयारामा. यथेव हि सुसज्जितं पुप्फफलभरितरुक्खादिसम्पन्नउय्यानं पविट्ठो राजा ताय सम्पत्तिया रमति, सम्मुदितो आमोदितप्पमोदितो होति, न उक्कण्ठेति, सायम्पि निक्खमितुं न इच्छति, एवमिमेहि कामालयतण्हालयेहि सत्ता रमन्ति, संसारवट्टे पमुदिता अनुक्कण्ठिता वसन्ति. तेन तेसं भगवा दुविधम्पि आलयं उय्यानभूमिं विय दस्सेन्तो ‘‘आलयारामा’’तिआदिमाह. सेसमेत्थ उत्तानमेव.

दुतियतथागतअच्छरियसुत्तवण्णना निट्ठिता.