४. उदकरहदसुत्तवण्णना

१०४. चतुत्थे उदकरहदो जण्णुकमत्तेपि उदके सति पण्णरससम्भिन्नवण्णत्ता वा बहलत्ता वा उदकस्स अपञ्ञायमानतलो उत्तानो गम्भीरोभासो नाम होतीति आह ‘‘पुराणपण्णरस…पे… गम्भीरोभासो नामा’’ति. तिपोरिसचतुपोरिसे पन उदके सति अच्छत्ता उदकस्स पञ्ञायमानतलो गम्भीरो उत्तानोभासो नाम होतीति आह ‘‘अच्छविप्पसन्नमणिवण्णउदको उत्तानोभासो नामा’’ति. उभयकारणसम्भवतो पन इतरे द्वे वेदितब्बा. पुग्गलेपि किलेसुस्सदभावतो गुणगम्भीरताय च अभावतो गुणगम्भीरानं सदिसेहि अभिक्कमनादीहि युत्तो उत्तानो गम्भीरोभासो नाम. इमिना नयेन सेसा वेदितब्बा.

उदकरहदसुत्तवण्णना निट्ठिता.