१. किमत्थियसुत्तवण्णना

१. दसकनिपातस्स पठमे अविप्पटिसारत्थानीति अविप्पटिसारप्पयोजनानि. अविप्पटिसारानिसंसानीति अविप्पटिसारुदयानि. एतेन अविप्पटिसारो नाम सीलस्स उदयमत्तं, संवद्धितस्स रुक्खस्स छायापुप्फसदिसं, अञ्ञो एव पनानेन निप्फादेतब्बो समाधिआदिगुणोति दस्सेति. ‘‘याव मग्गामग्गञाणदस्सनविसुद्धि, ताव तरुणविपस्सना’’ति हि वचनतो उपक्किलेसविमुत्तउदयब्बयञाणतो परं अयञ्च विपस्सना विरज्जति योगावचरो विरत्तो पुरिसो विय भरियाय सङ्खारतो एतेनाति विरागो.

किमत्थियसुत्तवण्णना निट्ठिता.