७. पठमआमकधञ्ञपेय्यालवग्गो

१. अञ्ञत्रसुत्तं

११३१. अथ खो भगवा परित्तं नखसिखायं पंसुं आरोपेत्वा भिक्खू आमन्तेसि – ‘‘तं किं मञ्ञथ, भिक्खवे, कतमं नु खो बहुतरं – यो वायं मया परित्तो नखसिखायं पंसु आरोपितो, अयं वा महापथवी’’ति? ‘‘एतदेव, भन्ते, बहुतरं, यदिदं – महापथवी; अप्पमत्तकायं भगवता परित्तो नखसिखायं पंसु आरोपितो. सङ्खम्पि न उपेति, उपनिधम्पि न उपेति, कलभागम्पि न उपेति महापथविं उपनिधाय भगवता परित्तो नखसिखायं पंसु आरोपितो’’ति.

‘‘एवमेव खो, भिक्खवे, अप्पमत्तका ते सत्ता ये मनुस्सेसु पच्चाजायन्ति; अथ खो एतेव बहुतरा सत्ता ये अञ्ञत्र मनुस्सेहि [मनुस्सेसु (पी. क.)] पच्चाजायन्ति. तं किस्स हेतु? अदिट्ठत्ता, भिक्खवे, चतुन्नं अरियसच्चानं. कतमेसं चतुन्नं? दुक्खस्स अरियसच्चस्स…पे… दुक्खनिरोधगामिनिया पटिपदाय अरियसच्चस्स’’.

‘‘तस्मातिह, भिक्खवे, ‘इदं दुक्ख’न्ति योगो करणीयो…पे… ‘अयं दुक्खनिरोधगामिनी पटिपदा’ति योगो करणीयो’’ति. पठमं.

२. पच्चन्तसुत्तं

११३२. अथ खो भगवा परित्तं नखसिखायं पंसुं आरोपेत्वा भिक्खू आमन्तेसि – ‘‘तं किं मञ्ञथ, भिक्खवे, कतमं नु खो बहुतरं – यो वायं मया परित्तो नखसिखायं पंसु आरोपितो, अयं वा महापथवी’’ति? ‘‘एतदेव, भन्ते, बहुतरं, यदिदं – महापथवी; अप्पमत्तकायं भगवता परित्तो नखसिखायं पंसु आरोपितो. सङ्खम्पि न उपेति, उपनिधम्पि न उपेति, कलभागम्पि न उपेति महापथविं उपनिधाय भगवता परित्तो नखसिखायं पंसु आरोपितो’’ति.

‘‘एवमेव खो, भिक्खवे, अप्पमत्तका ते सत्ता ये मज्झिमेसु जनपदेसु पच्चाजायन्ति; अथ खो एतेव बहुतरा सत्ता ये पच्चन्तिमेसु जनपदेसु पच्चाजायन्ति अविञ्ञातारेसु मिलक्खेसु [मिलक्खूसु (स्या. कं. क.)] …पे…. दुतियं.

३. पञ्ञासुत्तं

११३३. … ‘‘एवमेव खो, भिक्खवे, अप्पका ते सत्ता ये पन अरियेन पञ्ञाचक्खुना समन्नागता; अथ खो एतेव बहुतरा सत्ता ये अविज्जागता सम्मुळ्हा…पे…. ततियं.

४. सुरामेरयसुत्तं

११३४. … ‘‘एवमेव खो, भिक्खवे, अप्पका ते सत्ता ये सुरामेरयमज्जप्पमादट्ठाना पटिविरता; अथ खो एतेव बहुतरा सत्ता ये सुरामेरयमज्जप्पमादट्ठाना अपटिविरता…पे…. चतुत्थं.

५. ओदकसुत्तं

११३५. … ‘‘एवमेव खो, भिक्खवे, अप्पका ते सत्ता ये थलजा; अथ खो एतेव बहुतरा सत्ता ये उदकजा. तं किस्स हेतु…पे…. पञ्चमं.

६. मत्तेय्यसुत्तं

११३६. … ‘‘एवमेव खो, भिक्खवे, अप्पका ते सत्ता ये मत्तेय्या; अथ खो एतेव बहुतरा सत्ता ये अमत्तेय्या…पे…. छट्ठं.

७. पेत्तेय्यसुत्तं

११३७. … ‘‘एवमेव खो, भिक्खवे, अप्पका ते सत्ता ये पेत्तेय्या; अथ खो एतेव बहुतरा सत्ता ये अपेत्तेय्या…पे…. सत्तमं.

८. सामञ्ञसुत्तं

११३८. … ‘‘एवमेव खो, भिक्खवे, अप्पका ते सत्ता ये सामञ्ञा; अथ खो एतेव बहुतरा सत्ता ये असामञ्ञा…पे…. अट्ठमं.

९. ब्रह्मञ्ञसुत्तं

११३९. … ‘‘एवमेव खो, भिक्खवे, अप्पका ते सत्ता ये ब्रह्मञ्ञा; अथ खो एतेव बहुतरा सत्ता ये अब्रह्मञ्ञा…पे…. नवमं.

१०. पचायिकसुत्तं

११४०. … ‘‘एवमेव खो, भिक्खवे, अप्पका ते सत्ता ये कुले जेट्ठापचायिनो; अथ खो एतेव बहुतरा सत्ता ये कुले अजेट्ठापचायिनोति [अकुले जेट्ठापचायिनोति (स्या. कं.)] …पे…. दसमं.

पठमआमकधञ्ञपेय्यालवग्गो सत्तमो.

तस्सुद्दानं –

अञ्ञत्र पच्चन्तं पञ्ञा, सुरामेरयओदका;

मत्तेय्य पेत्तेय्या चापि, सामञ्ञं ब्रह्मपचायिकन्ति.