१. अज्झत्तनन्दिक्खयसुत्तं

१५६. ‘‘अनिच्चंयेव, भिक्खवे, भिक्खु चक्खुं अनिच्चन्ति पस्सति, सास्स [सायं (पी. क.)] होति सम्मादिट्ठि. सम्मा पस्सं निब्बिन्दति. नन्दिक्खया रागक्खयो; रागक्खया नन्दिक्खयो. नन्दिरागक्खया चित्तं सुविमुत्तन्ति वुच्चति…पे… अनिच्चंयेव, भिक्खवे, भिक्खु जिव्हं अनिच्चन्ति पस्सति, सास्स होति सम्मादिट्ठि. सम्मा पस्सं निब्बिन्दति. नन्दिक्खया रागक्खयो; रागक्खया…पे… चित्तं सुविमुत्तन्ति वुच्चति…पे… अनिच्चंयेव, भिक्खवे, भिक्खु मनं अनिच्चन्ति पस्सति, सास्स होति सम्मादिट्ठि. सम्मा पस्सं निब्बिन्दति. नन्दिक्खया रागक्खयो; रागक्खया नन्दिक्खयो. नन्दिरागक्खया चित्तं सुविमुत्तन्ति वुच्चती’’ति. पठमं.