१०. बाहिरानिच्चहेतुसुत्तं

१४३. ‘‘रूपा, भिक्खवे, अनिच्चा. योपि हेतु, योपि पच्चयो रूपानं उप्पादाय, सोपि अनिच्चो. अनिच्चसम्भूता, भिक्खवे, रूपा कुतो निच्चा भविस्सन्ति! सद्दा… गन्धा… रसा… फोट्ठब्बा… धम्मा अनिच्चा. योपि हेतु, योपि पच्चयो धम्मानं उप्पादाय, सोपि अनिच्चो. अनिच्चसम्भूता, भिक्खवे, धम्मा कुतो निच्चा भविस्सन्ति! एवं पस्सं…पे… ‘खीणा जाति, वुसितं ब्रह्मचरियं, कतं करणीयं, नापरं इत्थत्ताया’ति पजानाती’’ति. दसमं.