९. संयोजनियधम्मसुत्तं

१२२. ‘‘संयोजनिये च, भिक्खवे, धम्मे देसेस्सामि संयोजनञ्च. तं सुणाथ. कतमे च, भिक्खवे, संयोजनिया धम्मा, कतमञ्च संयोजनं? सन्ति, भिक्खवे, चक्खुविञ्ञेय्या रूपा इट्ठा कन्ता मनापा पियरूपा कामूपसंहिता रजनीया. इमे वुच्चन्ति, भिक्खवे, संयोजनिया धम्मा. यो तत्थ छन्दरागो, तं तत्थ संयोजनं…पे… सन्ति, भिक्खवे, जिव्हाविञ्ञेय्या रसा…पे… सन्ति, भिक्खवे, मनोविञ्ञेय्या धम्मा इट्ठा कन्ता मनापा पियरूपा कामूपसंहिता रजनीया. इमे वुच्चन्ति, भिक्खवे, संयोजनिया धम्मा. यो तत्थ छन्दरागो तं तत्थ संयोजन’’न्ति. नवमं.