८. अनत्तधम्मसुत्तं

१७७. सावत्थिनिदानं. एकमन्तं निसिन्नो खो आयस्मा राधो भगवन्तं एतदवोच – ‘‘‘अनत्तधम्मो, अनत्तधम्मो’ति, भन्ते, वुच्चति. कतमो नु खो, भन्ते, अनत्तधम्मो’’ति? ‘‘रूपं खो, राध, अनत्तधम्मो, वेदना अनत्तधम्मो, सञ्ञा अनत्तधम्मो, सङ्खारा अनत्तधम्मो, विञ्ञाणं अनत्तधम्मो. एवं पस्सं…पे… नापरं इत्थत्तायाति पजानाती’’ति. अट्ठमं.

९.खयधम्मसुत्तं

१७८. सावत्थिनिदानं. एकमन्तं निसिन्नो खो आयस्मा राधो भगवन्तं एतदवोच – ‘‘‘खयधम्मो, खयधम्मो’ति, भन्ते, वुच्चति. कतमो नु खो, भन्ते, खयधम्मो’’ति? ‘‘रूपं खो, राध, खयधम्मो, वेदना खयधम्मो, सञ्ञा खयधम्मो, सङ्खारा खयधम्मो, विञ्ञाणं खयधम्मो. एवं पस्सं…पे… नापरं इत्थत्तायाति पजानाती’’ति. नवमं.