९. सहेतुअनत्तसुत्तं

२०. सावत्थिनिदानं. ‘‘रूपं, भिक्खवे, अनत्ता. योपि हेतु योपि पच्चयो रूपस्स उप्पादाय, सोपि अनत्ता. अनत्तसम्भूतं, भिक्खवे, रूपं कुतो अत्ता भविस्सति! वेदना अनत्ता… सञ्ञा अनत्ता… सङ्खारा अनत्ता… विञ्ञाणं अनत्ता. योपि हेतु योपि पच्चयो विञ्ञाणस्स उप्पादाय, सोपि अनत्ता. अनत्तसम्भूतं, भिक्खवे, विञ्ञाणं कुतो अत्ता भविस्सति! एवं पस्सं…पे… नापरं इत्थत्तायाति पजानाती’’ति. नवमं.