९. उपातिधावन्तिसुत्तं

५९. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन भगवा रत्तन्धकारतिमिसायं अब्भोकासे निसिन्नो होति तेलप्पदीपेसु झायमानेसु.

तेन खो पन समयेन सम्बहुला अधिपातका तेसु तेलप्पदीपेसु आपातपरिपातं अनयं आपज्जन्ति, ब्यसनं आपज्जन्ति [नत्थि सीहळपोत्थके], अनयब्यसनं आपज्जन्ति [नत्थि सीहळपोत्थके]. अद्दसा खो भगवा ते सम्बहुले अधिपातके तेसु तेलप्पदीपेसु आपातपरिपातं अनयं आपज्जन्ते, ब्यसनं आपज्जन्ते, अनयब्यसनं आपज्जन्ते.

अथ खो भगवा एतमत्थं विदित्वा तायं वेलायं इमं उदानं उदानेसि –

‘‘उपातिधावन्ति न सारमेन्ति,

नवं नवं बन्धनं ब्रूहयन्ति;

पतन्ति पज्जोतमिवाधिपातका [… धिपाता (सी. स्या.)],

दिट्ठे सुते इतिहेके निविट्ठा’’ति. नवमं;