५. महामोग्गल्लानसुत्तं

२५. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन आयस्मा महामोग्गल्लानो भगवतो अविदूरे निसिन्नो होति पल्लङ्कं आभुजित्वा उजुं कायं पणिधाय कायगताय सतिया अज्झत्तं सूपट्ठिताय. अद्दसा खो भगवा आयस्मन्तं महामोग्गल्लानं अविदूरे निसिन्नं पल्लङ्कं आभुजित्वा उजुं कायं पणिधाय कायगताय सतिया अज्झत्तं सूपट्ठिताय.

अथ खो भगवा एतमत्थं विदित्वा तायं वेलायं इमं उदानं उदानेसि –

‘‘सति कायगता उपट्ठिता,

छसु फस्सायतनेसु संवुतो;

सततं भिक्खु समाहितो,

जञ्ञा निब्बानमत्तनो’’ति. पञ्चमं;