९. जटिलसुत्तं

९. एवं मे सुतं – एकं समयं भगवा गयायं विहरति गयासीसे. तेन खो पन समयेन सम्बहुला जटिला सीतासु हेमन्तिकासु रत्तीसु अन्तरट्ठके हिमपातसमये गयायं उम्मुज्जन्तिपि निमुज्जन्तिपि, उम्मुज्जनिमुज्जम्पि करोन्ति ओसिञ्चन्तिपि, अग्गिम्पि जुहन्ति – ‘‘इमिना सुद्धी’’ति.

अद्दसा खो भगवा ते सम्बहुले जटिले सीतासु हेमन्तिकासु रत्तीसु अन्तरट्ठके हिमपातसमये गयायं उम्मुज्जन्तेपि निमुज्जन्तेपि उम्मुज्जनिमुज्जम्पि करोन्ते [उम्मुज्जनिमुज्जं करोन्तेपि (सी. पी. क.)] ओसिञ्चन्तेपि अग्गिम्पि जुहन्ते – ‘‘इमिना सुद्धी’’ति.

अथ खो भगवा एतमत्थं विदित्वा तायं वेलायं इमं उदानं उदानेसि –

‘‘न उदकेन सुची होती, बह्वेत्थ न्हायती [नहायती (सी.)] जनो;

यम्हि सच्चञ्च धम्मो च, सो सुची सो च ब्राह्मणो’’ति. नवमं;