६. महापजापतिगोतमीथेरीगाथा

१५७. ‘‘बुद्ध वीर नमो त्यत्थु, सब्बसत्तानमुत्तम;

यो मं दुक्खा पमोचेसि, अञ्ञञ्च बहुकं जनं.

१५८. ‘‘सब्बदुक्खं परिञ्ञातं, हेतुतण्हा विसोसिता;

भावितो अट्ठङ्गिको [अरियट्ठङ्गिको (सी. क.), भावितट्ठङ्गिको (स्या.)] मग्गो, निरोधो फुसितो मया.

१५९. ‘‘माता पुत्तो पिता भाता, अय्यका च पुरे अहुं;

यथाभुच्चमजानन्ती, संसरिंहं अनिब्बिसं.

१६०. ‘‘दिट्ठो हि मे सो भगवा, अन्तिमोयं समुस्सयो;

विक्खीणो जातिसंसारो, नत्थि दानि पुनब्भवो.

१६१. ‘‘आरद्धवीरिये पहितत्ते, निच्चं दळ्हपरक्कमे;

समग्गे सावके पस्से, एसा बुद्धान वन्दना.

१६२. ‘‘बहूनं [बहुन्नं (सी. स्या.)] वत अत्थाय, माया जनयि गोतमं;

ब्याधिमरणतुन्नानं, दुक्खक्खन्धं ब्यपानुदी’’ति.

… महापजापतिगोतमी थेरी….