१२. चन्दाथेरीगाथा

१२२. ‘‘दुग्गताहं पुरे आसिं, विधवा च अपुत्तिका;

विना मित्तेहि ञातीहि, भत्तचोळस्स नाधिगं.

१२३. ‘‘पत्तं दण्डञ्च गण्हित्वा, भिक्खमाना कुला कुलं;

सीतुण्हेन च डय्हन्ती, सत्त वस्सानि चारिहं.

१२४. ‘‘भिक्खुनिं पुन दिस्वान, अन्नपानस्स लाभिनिं;

उपसङ्कम्म अवोचं [अवोचिं (क.)], ‘पब्बज्जं अनगारियं’.

१२५. ‘‘सा च मं अनुकम्पाय, पब्बाजेसि पटाचारा;

ततो मं ओवदित्वान, परमत्थे नियोजयि.

१२६. ‘‘तस्साहं वचनं सुत्वा, अकासिं अनुसासनिं;

अमोघो अय्यायोवादो, तेविज्जाम्हि अनासवा’’ति.

… चन्दा थेरी….

पञ्चकनिपातो निट्ठितो.