१२. धम्मदिन्नाथेरीगाथा

१२. ‘‘छन्दजाता अवसायी, मनसा च फुटा [फुट्ठा (स्या.), फुठा (सी. अट्ठ.)] सिया;

कामेसु अप्पटिबद्धचित्ता [अप्पटिबन्धचित्ता (क.)], उद्धंसोताति वुच्चती’’ति [उद्धंसोता विमुच्चतीति (सी. पी.)].

… धम्मदिन्ना थेरी….

१३.विसाखाथेरीगाथा

१३. ‘‘करोथ बुद्धसासनं, यं कत्वा नानुतप्पति;

खिप्पं पादानि धोवित्वा, एकमन्ते निसीदथा’’ति.

… विसाखा थेरी….

१४.सुमनाथेरीगाथा

१४. ‘‘धातुयो दुक्खतो दिस्वा, मा जातिं पुनरागमि;

भवे छन्दं विराजेत्वा, उपसन्ता चरिस्ससी’’ति.

… सुमना थेरी….