४. सिङ्गालमातुथेरीअपदानं

८२. ‘‘पदुमुत्तरो नाम जिनो, सब्बधम्मान पारगू;

इतो सतसहस्सम्हि, कप्पे उप्पज्जि नायको.

८३. ‘‘तदाहं हंसवतियं, जातामच्चकुले अहुं;

नानारतनपज्जोते, इद्धे फीते महद्धने.

८४. ‘‘पितुना सह गन्त्वान, महाजनपुरक्खता;

धम्मं बुद्धस्स सुत्वान, पब्बजिं अनगारियं.

८५. ‘‘पब्बजित्वान कायेन, पापकम्मं विवज्जयिं;

वचीदुच्चरितं हित्वा, आजीवं परिसोधयिं.

८६. ‘‘बुद्धे पसन्ना धम्मे च, सङ्घे च तिब्बगारवा;

सद्धम्मस्सवने युत्ता, बुद्धदस्सनलालसा [बुद्धदस्सनसालया (स्या.)].

८७. ‘‘अग्गं सद्धाधिमुत्तानं, अस्सोसिं भिक्खुनिं तदा;

तं ठानं पत्थयित्वान, तिस्सो सिक्खा अपूरयिं.

८८. ‘‘ततो मं सुगतो आह, करुणानुगतासयो;

‘यस्स सद्धा तथागते, अचला सुप्पतिट्ठिता;

सीलञ्च यस्स कल्याणं, अरियकन्तं पसंसितं.

८९. ‘‘‘सङ्घे पसादो यस्सत्थि, उजुभूतञ्च दस्सनं;

अदलिद्दोति तं आहु, अमोघं तस्स जीवितं.

९०. ‘‘‘तस्मा सद्धञ्च सीलञ्च, पसादं धम्मदस्सनं;

अनुयुञ्जेथ मेधावी, सरं बुद्धान [बुद्धानुसासनं (सी.), बुद्धानं सासनं (स्या.)] सासनं’.

९१. ‘‘तं सुत्वाहं पमुदिता, अपुच्छिं पणिधिं मम;

तदा अनोमो अमितो, ब्याकरित्थ विनायको;

‘बुद्धे पसन्ना कल्याणी, लच्छसे तं सुपत्थितं.

९२. ‘‘‘सतसहस्सितो कप्पे, ओक्काककुलसम्भवो;

गोतमो नाम गोत्तेन, सत्था लोके भविस्सति.

९३. ‘‘‘तस्स धम्मेसु दायादा, ओरसा धम्मनिम्मिता;

सिङ्गालकस्स [सिगालकस्स (सी. पी.)] माताति, हेस्सति सत्थु साविका’.

९४. ‘‘तं सुत्वा मुदिता हुत्वा, यावजीवं तदा जिनं;

मेत्तचित्ता परिचरिं, पटिपत्तीहि नायकं.

९५. ‘‘तेन कम्मेन सुकतेन, चेतनापणिधीहि च;

जहित्वा मानुसं देहं, तावतिंसमगच्छहं.

९६. ‘‘पच्छिमे च भवे दानि, गिरिब्बजपुरुत्तमे;

जाता सेट्ठिकुले फीते, महारतनसञ्चये.

९७. ‘‘पुत्तो सिङ्गालको नाम, ममासि विपथे रतो;

दिट्ठिगहनपक्खन्दो, दिसापूजनतप्परो.

९८. ‘‘नानादिसा नमस्सन्तं [नमस्सति (स्या.)], पिण्डाय नगरं वजं;

तं दिस्वा ओवदी बुद्धो, मग्गे ठत्वा विनायको.

९९. ‘‘तस्स देसयतो धम्मं, पनादो विम्हयो अहु;

द्वेकोटिनरनारीनं, धम्माभिसमयो अहु.

१००. ‘‘तदाहं परिसं गन्त्वा, सुत्वा सुगतभासितं;

सोतापत्तिफलं पत्ता, पब्बजिं अनगारियं.

१०१. ‘‘न चिरेनेव कालेन, बुद्धदस्सनलालसा;

अनुस्सतिं तं भावेत्वा, अरहत्तमपापुणिं.

१०२. ‘‘दस्सनत्थाय बुद्धस्स, सब्बदा च वजामहं;

अतित्तायेव पस्सामि, रूपं नयननन्दनं.

१०३. ‘‘सब्बपारमिसम्भूतं, लक्खीनिलयनं वरं;

रूपं सब्बसुभाकिण्णं, अतित्ता विहरामहं.

१०४. ‘‘जिनो तस्मिं गुणे तुट्ठो, एतदग्गे ठपेसि मं;

सिङ्गालकस्स या माता, अग्गा सद्धाधिमुत्तिका [संघविमुत्तिका (पी.), ममाधिमुत्तिका (क.)].

१०५. ‘‘इद्धीसु च वसी होमि, दिब्बाय सोतधातुया;

चेतोपरियञाणस्स, वसी होमि महामुनि.

१०६. ‘‘पुब्बेनिवासं जानामि, दिब्बचक्खु विसोधितं;

सब्बासवपरिक्खीणा, नत्थि दानि पुनब्भवो.

१०७. ‘‘अत्थधम्मनिरुत्तीसु, पटिभाने तथेव च;

ञाणं मम महावीर, उप्पन्नं तव सन्तिके.

१०८. ‘‘किलेसा झापिता मय्हं…पे… विहरामि अनासवा.

१०९. ‘‘स्वागतं वत मे आसि…पे… कतं बुद्धस्स सासनं.

११०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं सिङ्गालमाता भिक्खुनी इमा गाथायो अभासित्थाति.

सिङ्गालमातुथेरियापदानं चतुत्थं.