१. यसवतीपमुखअट्ठारसभिक्खुनीसहस्सअपदानं

१. ‘‘भवा सब्बे परिक्खीणा, भवा सन्ति विमोचिता;

सब्बासवा च नो नत्थि, आरोचेम महामुने.

२. ‘‘पुरिमं कुसलं कम्मं [परिकम्मञ्च कुसलं (स्या.)], यं किञ्चि साधुपत्थितं;

परिभोगमयं दिन्नं, तुय्हत्थाय महामुने.

३. ‘‘बुद्धपच्चेकबुद्धानं, सावकानञ्च पत्थितं [बुद्धानं सावकानञ्च (सी. क.)];

परिभोगमयं दिन्नं, तुय्हत्थाय महामुने.

४. ‘‘उच्चनीचमयं कम्मं, भिक्खूनं साधुपत्थितं;

उच्चाकुलपरिकम्मं, कतमेतं महामुने [कतम्हेहि महामुने (स्या. पी.)].

५. ‘‘तेनेव सुक्कमूलेन, चोदिता कम्मसम्पदा;

मानुसिकमतिक्कन्ता, जायिंसु खत्तिये कुले.

६. ‘‘उप्पत्ते च कते कम्मे, जातिया वापि एकतो;

पच्छिमे एकतो जाता, खत्तिया कुलसम्भवा.

७. ‘‘रूपवती भोगवती, लाभसक्कारपूजिता;

अन्तेपुरे महावीर, देवानं विय नन्दने.

८. ‘‘निब्बिन्दित्वा अगारम्हा, पब्बजिम्हनगारियं;

कतिपाहं उपादाय, सब्बा पत्ताम्ह निब्बुतिं.

९. ‘‘चीवरं पिण्डपातञ्च, पच्चयं सयनासनं;

उपनेन्ति बहू अम्हे, सदा सक्कतपूजिता.

१०. ‘‘किलेसा झापिता अम्हं, भवा सब्बे समूहता;

नागीव बन्धनं छेत्वा, विहराम अनासवा.

११. ‘‘स्वागतं वत नो आसि, मम बुद्धस्स सन्तिके;

तिस्सो विज्जा अनुप्पत्ता, कतं बुद्धस्स सासनं.

१२. ‘‘पटिसम्भिदा चतस्सो, विमोक्खापि च अट्ठिमे;

छळभिञ्ञा सच्छिकता, कतं बुद्धस्स सासनं’’.

इत्थं सुदं यसवतीपमुखानि खत्तियकञ्ञाभिक्खुनियो अट्ठारससहस्सानि भगवतो सम्मुखा इमा गाथायो अभासित्थाति.

यसवतीपमुखअट्ठारसभिक्खुनीसहस्सापदानं पठमं.