९. यसोधरापमुखदसभिक्खुनीसहस्सअपदानं

४११. ‘‘कप्पे च सतसहस्से, चतुरो च असङ्खिये;

दीपङ्करो नाम जिनो, उप्पज्जि लोकनायको.

४१२. ‘‘दीपङ्करो महावीरो, वियाकासि विनायको;

सुमेधञ्च सुमित्तञ्च, समानसुखदुक्खतं.

४१३. ‘‘सदेवकञ्च पस्सन्तो, विचरन्तो सदेवकं;

तेसं पकित्तने अम्हे, उपगम्म समागमं.

४१४. ‘‘अम्हं सब्बपति होहि [सब्बा पती होन्ति (पी.)], अनागतसमागमे;

सब्बाव तुय्हं भरिया, मनापा पियवादिका.

४१५. ‘‘दानं सीलमयं सब्बं, भावना च सुभाविता;

दीघरत्तञ्च नो [दीघरत्तमिदं (स्या. क.)] सब्बं, परिच्चत्तं महामुने.

४१६. ‘‘गन्धं विलेपनं मालं, दीपञ्च रतनामयं;

यंकिञ्चि पत्थितं सब्बं, परिच्चत्तं महामुनि.

४१७. ‘‘अञ्ञं वापि कतं कम्मं, परिभोगञ्च मानुसं;

दीघरत्तञ्हि नो सब्बं, परिच्चत्तं महामुनि.

४१८. ‘‘अनेकजातिसंसारं, बहुं पुञ्ञम्पि नो कतं;

इस्सरमनुभोत्वान, संसरित्वा भवाभवे.

४१९. ‘‘पच्छिमे भवे सम्पत्ते, सक्यपुत्तनिवेसने;

नानाकुलूपपन्नायो, अच्छरा कामवण्णिनी.

४२०. ‘‘लाभग्गेन यसं पत्ता, पूजिता सब्बसक्कता;

लाभियो अन्नपानानं, सदा सम्मानिता मयं.

४२१. ‘‘अगारं पजहित्वान, पब्बजिम्हनगारियं;

अड्ढमासे असम्पत्ते, सब्बा पत्ताम्ह निब्बुतिं.

४२२. ‘‘लाभियो अन्नपानानं, वत्थसेनासनानि च;

उपेन्ति पच्चया सब्बे, सदा सक्कतपूजिता.

४२३. ‘‘किलेसा झापिता अम्हं…पे… विहराम अनासवा.

४२४. ‘‘स्वागतं वत नो आसि…पे… कतं बुद्धस्स सासनं.

४२५. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं यसोधरापमुखानि दसभिक्खुनीसहस्सानि भगवतो सम्मुखा इमा गाथायो अभासित्थाति.

यसोधरापमुखदसभिक्खुनीसहस्सापदानं नवमं.