१०. उदकदायिकाथेरीअपदानं

११६. ‘‘नगरे बन्धुमतिया, अहोसिं उदहारिका;

उदहारेन जीवामि, तेन पोसेमि दारके.

११७. ‘‘देय्यधम्मो च मे नत्थि, पुञ्ञक्खेत्ते अनुत्तरे;

कोट्ठकं उपसङ्कम्म, उदकं पट्ठपेसहं.

११८. ‘‘तेन कम्मेन सुकतेन, तावतिंसमगच्छहं;

तत्थ मे सुकतं ब्यम्हं, उदहारेन निम्मितं.

११९. ‘‘अच्छरानं सहस्सस्स, अहञ्हि पवरा तदा;

दसट्ठानेहि ता सब्बा, अभिभोमि सदा अहं.

१२०. ‘‘पञ्ञासं देवराजूनं, महेसित्तमकारयिं;

वीसतिचक्कवत्तीनं, महेसित्तमकारयिं.

१२१. ‘‘दुवे भवे संसरामि, देवत्ते अथ मानुसे;

दुग्गतिं नाभिजानामि, दकदानस्सिदं फलं.

१२२. ‘‘पब्बतग्गे दुमग्गे वा, अन्तलिक्खे च भूमियं;

यदा उदकमिच्छामि, खिप्पं पटिलभामहं.

१२३. ‘‘अवुट्ठिका दिसा नत्थि, सन्तत्ता कुथितापि [सन्तत्ता कुथिता न च (सी. पी.), सन्तत्ता खुप्पिता हि मे (स्या.)] च;

मम सङ्कप्पमञ्ञाय, महामेघो पवस्सति.

१२४. ‘‘कदाचि नीयमानाय, ञातिसङ्घेन मे तदा;

यदा इच्छामहं वस्सं, महामेघो अजायथ.

१२५. ‘‘उण्हं वा परिळाहो वा, सरीरे मे न विज्जति;

काये च मे रजो नत्थि, दकदानस्सिदं फलं.

१२६. ‘‘विसुद्धमनसा अज्ज, अपेतमनपापिका;

सब्बासवपरिक्खीणा, नत्थि दानि पुनब्भवो.

१२७. ‘‘एकनवुतितो कप्पे, यं दकं अददिं तदा;

दुग्गतिं नाभिजानामि, दकदानस्सिदं फलं.

१२८. ‘‘किलेसा झापिता मय्हं…पे… विहरामि अनासवा.

१२९. ‘‘स्वागतं वत मे आसि…पे… कतं बुद्धस्स सासनं.

१३०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं उदकदायिका भिक्खुनी इमा गाथायो अभासित्थाति.

उदकदायिकाथेरियापदानं दसमं.

सुमेधावग्गो पठमो.